मुख्यमंत्री सहाय्यता निधी-टाटा ट्रस्टच्या करारातून रुग्णांना दिलासा पहिल्याच करारातून ८९.६० लाख रुपयांची मदत

मुंबई, दि. २४ : यकृत प्रत्यारोपण, कर्करोग तसेच मेंदूवरील शस्त्रक्रिया यांसारख्या महागड्या उपचारांसाठी मुख्यमंत्री सहाय्यता निधी आणि टाटा ट्रस्ट यांच्यात झालेला पहिलाच सामंजस्य करार राज्यातील गरजू रुग्णांसाठी मोठा दिलासा ठरत आहे. या करारामुळे आर्थिकदृष्ट्या दुर्बल रुग्णांना वेळेत उपचार मिळण्यास मदत होत असून, रुग्ण आणि त्यांच्या कुटुंबीयांमध्ये समाधानाचे वातावरण निर्माण झाले आहे. मुख्यमंत्री सहाय्यता निधी आणि टाटा ट्रस्ट यांच्यातील करारानंतर अवघ्या सहा महिन्यांत राज्यातील विविध भागांतील ९ रुग्णांना ८९ लाख ६० हजार ३०१ रुपयांचे आर्थिक सहाय्य मंजूर करण्यात आले आहे. या मदतीतून यकृत प्रत्यारोपण, कर्करोगावरील उपचार आणि मेंदूवरील शस्त्रक्रिया अशा अत्यंत खर्चिक उपचारांचा मार्ग सुकर झाला आहे. मुख्यमंत्री सहाय्यता निधी व धर्मादाय रुग्णालय मदत कक्ष आणि टाटा ट्रस्ट यांच्यात १२ फेब्रुवारी २०२६ रोजी सामंजस्य करार करण्यात आला. या कराराअंतर्गत राज्यातील १५० गरजू रुग्णांना दुर्धर व गंभीर आजारांवरील उपचारांसाठी आर्थिक सहाय्य उपलब्ध करून देण्याचे उद्दिष्ट निश्चित करण्यात आले आहे. या उपक्रमामुळे आर्थिक अडचणींमुळे उपचारांपासून वंचित राहणाऱ्या रुग्णांना वेळेवर वैद्यकीय मदत मिळण्याचा मार्ग मोकळा झाला आहे. तसेच, याच धर्तीवर इतर नामांकित संस्थांसोबतही सामंजस्य करार करण्याची प्रक्रिया सुरू असून, हे करार लवकरच पूर्ण होण्याची अपेक्षा आहे. त्यामुळे राज्यातील अधिकाधिक गरजू रुग्णांना उपचारासाठी आर्थिक मदत मिळणार आहे. मुख्यमंत्री सहाय्यता निधी आणि धर्मादाय रुग्णालय मदत कक्षाच्या माध्यमातून शासन, सामाजिक संस्था आणि आरोग्य क्षेत्र यांच्यातील समन्वय अधिक प्रभावी करण्याचा प्रयत्न केला जात आहे. या उपक्रमामुळे पैशांअभावी उपचारांपासून वंचित राहणाऱ्या रुग्णांना मोठा आधार मिळत आहे. कक्ष प्रमुखांचे आवाहन मुख्यमंत्री देवेंद्र फडणवीस यांच्या मार्गदर्शनाखाली हा सामंजस्य करार करण्यात आला आहे. याच धर्तीवर इतर नामांकित संस्थांसोबतही सामंजस्य करार करण्याची प्रक्रिया सुरू असून, त्यातून राज्यातील अधिकाधिक गरजू रुग्णांना उपचारासाठी आर्थिक मदत उपलब्ध होणार आहे. “पैशांअभावी कोणत्याही रुग्णाचा उपचार थांबू नये, या उद्देशाने मुख्यमंत्री सहाय्यता निधी व धर्मादाय रुग्णालय मदत कक्ष सातत्याने कार्यरत आहे. गरजू रुग्णांनी अधिक माहितीसाठी १८०० १२३ २२११ या टोल फ्री क्रमांकावर संपर्क साधावा,” असे आवाहन मुख्यमंत्री सहाय्यता निधी व धर्मादाय रुग्णालय मदत कक्षाचे कक्ष प्रमुख रामेश्वर नाईक यांनी केले आहे.