तेल विकत घेताना ‘ही’ चूक ठरेल घातक, लक्षात ठेवा ३ नियम! अन्न आणि औषध प्रशासनाचाही इशारा

 

सुटे तेल म्हणजे मोठ्या डब्यात किंवा कंटेनरमध्ये ठेवलेले तेल थेट ग्राहकाला बाटली, डबा किंवा पिशवीत भरुन दिले जाते. अशा तेलाच्या बाबतीत ग्राहकाला ते नेमके कोणत्या उत्पादकाचे आहे, त्याची निर्मिती कधी झाली, त्याचा साठा किती काळ करण्यात आला आणि त्यात काही भेसळ झाली आहे का, याची खात्री करणे कठीण होते. सीलबंद पॅकेटवर मात्र उत्पादकाचे नाव, बॅच क्रमांक, उत्पादनाची माहिती, मुदत आणि इतर आवश्यक तपशील तपासता येतात.

एफडीएच्या तपासणीत खाद्यतेलाच्या विक्री आणि साठवणुकीशी संबंधित अनेक गंभीर त्रुटी समोर आल्याचे मुंढे यांनी सांगितले. काही ठिकाणी तेलाचा स्रोत आणि बॅचची माहिती उपलब्ध नसणे, अयोग्य पॅकिंगमध्ये तेल ठेवणे तसेच तेलाच्या गुणवत्तेबाबत आवश्यक नियमांचे पालन न करणे अशा बाबी आढळल्या. त्यामुळे सुट्या तेलाच्या माध्यमातून भेसळ किंवा असुरक्षित तेल ग्राहकापर्यंत पोहोचण्याचा धोका वाढतो.

या कारवाईमागे केवळ भेसळ रोखणे एवढाच उद्देश नाही, तेलाची निर्मितीपासून ग्राहकापर्यंतची संपूर्ण साखळी सुरक्षित आणि तपासता येण्यासारखी असावी, यावर एफडीएने भर दिला आहे. त्यामुळे उत्पादन, प्रक्रिया, वाहतूक, साठवणूक, पॅकिंग आणि किरकोळ विक्री या प्रत्येक टप्प्यावर नियमांचे पालन करण्याचे निर्देश देण्यात आले आहेत.

मात्र याचा अर्थ सुटे तेल घेतले की ते हमखास भेसळयुक्त असते, असा नाही. मुख्य मुद्दा असा आहे की सुट्या तेलाच्या बाबतीत त्याची गुणवत्ता आणि मूळ स्रोत ग्राहकाला सहज पडताळता येत नाही. म्हणून शक्यतो योग्य पद्धतीने सीलबंद, लेबल असलेले आणि अधिकृत माहिती नमूद केलेले खाद्यतेल घेणे अधिक सुरक्षित ठरते.