१९९४ च्या मुख्यमंत्र्यांचं हे पाप’; विखे पाटलांच्या टीकेवर शरद पवारांचा पलटवार, ‘आजपर्यंत तुम्ही काय करताय ?

मराठा आरक्षणाचा मुद्दा पुन्हा ऐरणीवर; जरांगे पाटलांच्या उपोषणाच्या पार्श्वभूमीवर राजकीय आरोप-प्रत्यारोपांना वेग बारामती : मराठा आरक्षणाच्या मागणीसाठी मनोज जरांगे पाटील यांनी जालना जिल्ह्यातील अंतरवाली सराटी येथे सुरू केलेल्या बेमुदत उपोषणाचा आज सहावा दिवस आहे. या आंदोलनाच्या पार्श्वभूमीवर राज्य सरकार आणि आंदोलकांमध्ये चर्चेचे प्रयत्न सुरू असतानाच, मराठा आरक्षणाच्या प्रश्नावरून राजकीय आरोप-प्रत्यारोपही तीव्र झाले आहेत. � राज्य सरकारच्या वतीने मंत्री राधाकृष्ण विखे पाटील आणि उदय सामंत यांनी पत्रकार परिषद घेत सरकारची भूमिका स्पष्ट केली. यावेळी विखे पाटील यांनी १९९४ सालच्या निर्णयाचा संदर्भ देत तत्कालीन सरकारवर निशाणा साधला. मंडल आयोगाच्या काळात मराठा समाजाचा समावेश झाला असता तर आजची परिस्थिती निर्माण झाली नसती, असा दावा करत त्यांनी तत्कालीन मुख्यमंत्र्यांवर अप्रत्यक्षपणे टीका केली. � ‘१९९४ पासून आजपर्यंत तुम्ही काय करताय?’ विखे पाटलांच्या या टीकेला राष्ट्रवादी काँग्रेसचे अध्यक्ष शरद पवार यांनी बारामती येथे मोजक्या शब्दांत प्रत्युत्तर दिले. “१९९४ पासून आजपर्यंत तुम्ही काय करताय? २६ वर्षे झाली,” असा सवाल पवारांनी उपस्थित केला. सरकारकडून आज काही मंत्री मनोज जरांगे पाटील यांची भेट घेऊन निर्णयाची माहिती देणार असल्याचे सांगितले जात आहे. हा निर्णय नेमका काय आहे, ते पाहू, असेही पवार म्हणाले. � सरकारकडून चर्चेचे प्रयत्न सुरू दरम्यान, मनोज जरांगे पाटील यांच्या मागण्यांवर सरकारकडून चर्चा सुरू आहे. सरकारचे शिष्टमंडळ अंतरवाली सराटी येथे जाऊन जरांगे यांच्याशी चर्चा करण्याच्या प्रयत्नात आहे. सातारा आणि कोल्हापूर गॅझेटच्या संदर्भात जीआर काढण्याची मागणी जरांगे यांनी कायम ठेवली आहे. � जरांगे पाटील यांनी पाणी आणि सलाईन घेतले असले तरी मागण्या मान्य होईपर्यंत उपोषण सुरू ठेवण्याची भूमिका घेतली आहे. त्यामुळे सरकार आणि आंदोलकांमधील पुढील चर्चा तसेच सरकारकडून घेतला जाणारा निर्णय याकडे संपूर्ण महाराष्ट्राचे लक्ष लागले आहे. � राजकीय संघर्षाला नवे वळण मराठा आरक्षणाचा प्रश्न सोडवण्यासाठी सरकारकडून प्रयत्न सुरू असल्याचा दावा केला जात असताना, १९९४ च्या निर्णयाची जबाबदारी नेमकी कोणाची आणि गेल्या अनेक वर्षांत सत्तेत असलेल्या सरकारांनी काय केले, यावरून आता राजकीय वाद रंगण्याची चिन्हे आहेत. विखे पाटील आणि शरद पवार यांच्यातील या शाब्दिक संघर्षामुळे मराठा आरक्षणाचा मुद्दा पुन्हा एकदा राजकीय चर्चेच्या केंद्रस्थानी आला आहे.